(English follows)
20 September 2016
Beste Solidariteit-lid
Beoogde veranderinge aan die RDM-bedingingseenheid
Solidariteit is gewikkel in beraadslagings met RDM in ’n poging om alternatiewe oplossings te vind vir die voorgestelde wysiging aan bestaande bedingingseenhede. RDM se voorstel sal meer as 140 Solidariteit-lede negatief raak, die tweede grootste groep geaffekteerde werknemers naas die nie-geaffilieerde werknemersgroep waar by die 300 werknemers uit hul bestaande bedingingseenheid verwyder sal word. Ingevolge RDM se voorstel sal alle werknemers wat R500 000 of meer per jaar verdien in die toekoms uitgelewer wees aan bestuur se diskresie wanneer dit kom by die toekenning van jaarlikse salarisverhogings, terwyl slegs ambagsmanne en werknemers wat R300 000 of minder per jaar toegelaat sal wees om deel te bly van salarisonderhandelinge by die bedingingsraad.
Solidariteit sal enige skending van ons lede se reg op vryheid van assosiasie en die manipulering van hul kollektiewe bedingingsregte, soos wat hierbo in die vooruitsig gestel word, ten sterkste teenstaan. Die redes wat deur RDM aangevoer word, dra nie gewig nie en is hoegenaamd nie uniek aan RDM nie. RDM het ingestem om gedetailleerde inligting en verduidelikings aan vakbonde te verskaf om die aard van die probleem wat hy probeer aanspreek, te verduidelik en te staaf. Solidariteit is positief dat deursigtigheid in die konsultasieproses met vakbonde, wat meer as 50% van RDM werknemers verteenwoordig, tot ’n positiewe oplossing kan lei.
Indien die partye nie in staat is om ’n alternatiewe, vriendskaplike oplossing te vind nie, is Solidariteit gerat om alles in ons vermoë te doen om die voorstel en enige afwyking van die definisie van bedingingseenheid, soos dit tans bedoel word, aan te vat. Dit mag dalk nodig wees dat Solidariteit hom tot die onderskeie dispuutbeslegtingsmeganismes sal moet wend ten einde ons lede se regte te beskerm en daarom doen ons ’n beroep op lede om vas te staan gedurende die prosesse om sodoende u toekomstige deelname aan kollektiewe bedinging te verseker.
Dit is ongelukkig so dat RDM homself tot oningeligte en onbeskermde werknemers, wat nie aan vakbonde behoort nie en wat dalk té laat gaan besef wat die volle implikasies van die voorstel is, kan wend om steun vir die voorstel te kry. Solidariteit versoek die bystand van lede om nie-vakbondwerknemers ingelig te hou oor die moontlike impak van RDM se voorstel. Neem asseblief kennis dat RDM se voorstel nagenoeg 200 werknemers van kollektiewe salarisonderhandelinge sal ontsê.
Solidariteit verseker lede dat ons alles in ons vermoë gaan doen om te verseker dat ons lede se regte regdeur hierdie proses beskerm word.
Solidariteit-groete
Om by Solidariteit aan te sluit SMS die woord RDM na 34802 (R2/SMS)